白话广州 斑马线上的悲剧谁来承担责任？

前天，喺芳村东沙大道东塱村路口，一对兄弟返学过斑马线，结果弟弟畀搅拌车碾死，瞬时间两兄弟就阴阳永隔，真系人间惨剧。之后记者调查发现，事发地附近两间学校一间船厂，上万人流，5处斑马线仅设一个红绿灯。

白话广州　◎老猫烧须 记者

前天，喺芳村东沙大道东塱村路口，一对兄弟返学过斑马线，结果弟弟畀搅拌车碾死，瞬时间两兄弟就阴阳永隔，真系人间惨剧。之后记者调查发现，事发地附近两间学校一间船厂，上万人流，5处斑马线仅设一个红绿灯。噉落呢啲交通规划可能冇几唔扯鬼火。唔通呢细蚊仔惨死于斑马线上，真系“轻于鸿毛”？唔通喺办公室岳高头、渺渺嘴嘅交通官员，佢哋嘅命就“重于泰山”？点解咁长时间都冇人去整下红绿灯，非要死着人先至“高度重视”？噉落其中嘅原因可能系官员唔使行路，尽系搭车？

其实，呢交通规划喺广州都存在诸多问题，而且之前我都讲过，譬如人行天桥隔居民区唔知有几远，譬如有啲马路人行道宽度相比几个道嘅机动车道就一啲啲，譬如嗰斑马线对面绿灯闪下闪下就冇晒，搞得行人进退两难，随便举几个例子就可以睇得出依家系交通规划摆明就机动车优先，而唔系行人优先。行人优先都做唔到，实现公交优先就唔知何年何月啦。

咁应该点办呢？我个人嘅睇法就系干脆除了公务急事动用公务车，官员们上落班全部坐公交车或者骑单车、行路都得；小车我噉至好就唔好买啩，公务员理当为节能减排作出表率。呢要定成制度严格执行，咁样或者可以从根本上解决交通问题，因为官员们可以喺斑马线上与民同乐，成日都咁调研，唔掂都搞到掂啦。你以为我讲笑咩？